Comunicado Judeo Español (En dialecto judeo-español)
Artículo por Moshe Shaul
KOMUNIKADO
En Yad Ben Zvi, en Yerushalayim, tuvo lugar dia de jueves, 6.11.1997, la sesion inaugurala del Konsejo Publiko de la Autoridad Nasionala para la Kultura Djudeo-espanyola en Israel, kreada en vigor de la ley a este efekto adoptada por la Kneset el 6.3.1996.
El Konsejo tiene 21 miembro, nombrados por el ministro de Edukasion, Kultura i Sport en reprezentasion de las institusiones, asosiasiones i otros faktores mas ke son aktivos en el kampo de la kultura djudeo-espanyola en Israel. Komo prezidente de la Autoridad fue nombrado el V Prezidente del Estado, Yitshak Navon, i komo vise-prezidente, Moshe Shaul – fondador i direktor de la revista djudeo-espanyola Aki Yerushalayim.
La kreasion de la Autoridad para la Kultura Djudeo-espanyola marka el empesijo de un muevo kapitolo en la istoria de la lucha para la konservasion i promosion de la lengua djudeo-espanyola i su kultura. Segun lo fue apuntado por el sr Navon, la importansia de esta institusion se topa en el echo ke eya fue kreada en vigor de una ley adoptada por la Kneset, reflektando el rekonosimiento ofisial de la importansia ke tiene la kultura djudeo-espanyola para el puevlo djudio entero i la responsabilidad del Estado de Israel para su konservasion i promosion.
Despues ke en la primera sesion del Konsejo de la Autoridad fueron elijidos su Komite Exekutivo i su Direktor Jeneral, ya se puedra empesar agora en la elaborasion de su programa de lavoro. La prioridad sera dada a los proyektos mas urjentes komo, por enshemplo, el ensenyamiento del djudeo-espanyol sovre una mas grande eskala ke asta agora, el arekojimiento de toda la kreasion literaria i folklorika en djudeo-espanyol, antes ke se piedran, etc. etc. Se estudiara i se apoyara tambien, naturalmente, una larga seria de proyektos komo la organizasion de konferensias, seminarios i kongresos internasionales ansi ke ekspozisiones i konsertos de kantes djudeo-espanyoles, la publikasion de livros i la produksion de programas de radio, televizion i multi-media, etc. etc.
La reushidad de la Autoridad a kumplir todas las esperansas de los ke kudyan por el futuro de la kultura djudeo-espanyola dependera en una grande mizura de los medios finansarios ke el Estado metera a su dispozision; ma no menos de esto, eya dependera tambien de la mizura en la kuala la Autoridad puedra despertar una mas grande prontitud, al seno de los sefaradis en el mundo entero, a kolaborar i djuntarsen a un esforso komun afin de asigurar la kontinuidad de esta kultura i no deshar ke eya se piedra en las profundinas del ulvido.